Woche 6: Beerdigung i na andara Wealt

"Min erschta Usflug inna Dorf!"

Bild 1: Da Christian hot üs iglada, be na Beerdigung vo nam hoha Würdenträger vo nam Dorf, dabei zum si. Mit na paar Öschtarichischa Gäscht hond mir üs denn im Institut troffa und sind im 3er Konvio losgfahra. Usse us Enugu und ab id Pampas. Sobald ma a klä usse us da Stadt kut isch num viel los abseits vo da Hauptschtroß (Autobahn). Uf nam klenna Rastplatz hond mir denn kurze Pause gmacht. A da Autos unschwer erkennbar: "Stadt" trifft uf "Dorf," "Rich" trifft uf "Arm".

Bild 2: Über Stock und über Stein ischas denna no eppa 1,5 Stund ganga, immer da Berg uffe. D Fealdweag be üs sind Autobahn im Gegasatz zu dera Stroß, dia ned me war, als Dreack wo ma d Botanik davo fern hebt. Oa klenns Dörfle kut noch am andara. Dazwüschat nur grüanes Dickicht. Wenn ma vorbeifahrt kond d Kind ussa und rüafand noch da tolla Autos. Wenn se denn no seahand, dass do Wiße dinna sitzand, sind se ganz aus dem Häuschen. Fascht uf am ganza Weag hot üs an Kinderchor begleitet: "Onye ocha", wiße Lüt!!!!!

Bild 3: So ischas o witr ganga, wo mir i deam Dorf, am Ende vo na Bergkanta ako sind. Oa "Schtroß" und daneabs oa alte, klenne Stromleitung isch des oanzige des des Dorf mit am Rescht vo da Wealt verbindet. Mir sind usgschtiga und i han an Tumult erleabt, wia no nia zuvor. Frödagschroa, Tanz, Trummlamusik, an Hufa total farbig aglete Lüt, dia de aschouand as wärscht an Goascht. Jeda schüttelt dir d Hand, will di berühra.
Bild 4: A altersgebeugtes Männle, oana vo da Dorfältaschta hot zu da Trummla an Freudentanz ufn Parkett glet, dass d nur no schtauna hosch künna. Uf sin Schtock gelehnt hot er üs denn strahlend d Händ gschüttelt und hot üs im Dorf willkommen ghoaßa!

Bild 4: D "Hauptschtroß" vom Dorf. Vorna am högschta Punkt vom Dorf hot der Mensch gleabt, für dean do dia Beerdigung plant isch. Da Lüt isch aber nüt azummirka. Der tägliche Umgang mit am Tod isch eppas ganz natürliches. Trotzdem würt an Grund zum Fäschta ned usglo, zumal jo ned Irgendeppr gschtorba isch, sondern a anerkannte Dorfgröße. Alle zühand s bescht Gwand a und für a Wile lot jeda im Dorf sis Tagwerk ligga.

Bild 5: A klä us am Kontext grissa isch dia Hütta vom "Igwe", vom Dorfschef, vom König. Er hot do s Säga, nüt loft ohne sine Zustimmung. Polizei und Gerichtbarkeit gits do ned. Alles würt seal gregelt, uf nam großa Platz anara Sita vom Dorf. Ida Mitte schtot an Bom: S eigentliche Dorfzentrum.

Bild 6: Einfach a schös Foto. Erwähnenswert: D Kinder luagand do seal ufanand. Sobald se num a da Bruscht gschtillt würand und halbweags lofa künnand ,kümmern se d Gschwüschtrige und verwandte Kinder um dia Klenna.

Bild 6: Des eigentliche Begräbnis findet statt. Alles würt a klä ruhiger. und fascht a klä andächtig. Vorna links (ma siahts ned) würt gad da Tote direkt vor sinam Hus vergraba. Heratransportiert wora isch er us am Nochburdorf, döt hots nämli an Kühlraum. Wo er widr innerhalb vom oagana Dorf war, hond zwoa Kanona Schüss abgia, als Zeichen, dass der Ma s letscht mol hoamko isch.

Bild 7: Danoch würand rituelle Tänz, vo da Dorfgruppa ufgführt. As git Zeassat und Ztrinkat. Trummlamusik schpilt widr. Dia Andächtigkeit isch so schneall ganga, wia se ko isch. Ausgelassenes Feiern isch agset.

Bild 6: Oa Stund spöter sind mir scho widr uf am Hoamweag. Landschafta ohne jegliche menschliche Iflüss zühand neabs da Schtroß a üs vorbei. Bergketta noch Bergketta nur Natur. D Obatsunna taucht d Landschaft i na goldiges grüa. As richacht noch würziga rota Erde und Reagaluft. Ma hört Grilla zirpa und Vögl singa, hinter üs a Okata fahra. I hätt nia dacht, dass i so äppas jemols erleaba wür. Mine Bilder und Worte sind nur a blasses Bild, vo nam Stuck Wealt, des sich da Wealt entzoga hot. A lange Fahrt ligt no vor üs, zruck id Realität.