Was tua, wenn ma richtig "aguna agum" isch?

"Neabs am Geald dreht se do s Leaba meischtens um Eassa!"

Bild 1: A richtiges Feschtessen znacht hots am erschta Tag, wo mir id Schtadt sind, gia. Erschtens hond mir vo deam Usflug an riesen Hunger ka und zweitens hond mir üs mit richtiga Feinheiten ideckt. Richtiges französisches Baguette, Wurscht undsogär Käs und Butter, dazua a körigs Pier und Eva (des beschte Wasser wos zum kofa git.), Früchte und "Suja" (a Schpezialität us gegrilltem Rindsfleisch). Zum des ganze abzumrunda hots denn schpöter no a Fläschle Wi gia.
Am Strand gits gär koan Schtrom, mir hond do aufladbare LED-Lampa mitgno, dia üs o dahoam (bi Schtromusfall) gute Dienschte geleischtet hond.

Bild 2: Schpezial isch natürli, dass d richtig fangfrisch Fisch kofa kasch. Des machscht am Schtrand, direkt wenn d Fischer zruck kond. Dia hond denn alles Mögliche im Boot, Krabba, klenne und große Fisch. Wia be nam klänna Volksfescht würt denn dia "Ernte" mit großem Gefolge is Dorf tret. Mir hond denn do einiges mit am Preis ummanandgfeilscht, verzellt wia schö sis Boot isch und gfrogt, wais da Familie got. Des kört se so. Dafür hot er üs denn o an ganz an fära Preis gmacht.

Bild 3: Üsere Errungenschaft 4 schöne Fischle. Da Candy hot dia denn glei usgno und heragrichtet. Uf nam Grill hond mir se denn gmacht. Vom Gruch aglockt isch da klenne Mann mit ufgschperrta Oga und Nasa am Zu gschtanda und hot beobachtet, was as do git. Er hot denn vo allna 4 Fisch d Köpf verputzt, sozusagen mit Haut und Haar, bis uf d Knocha....
Iglada waren zu deam Fäschtessen denn d Frau vom Candy und d Schwöschter, jeweils mit Boppele. Vo da Fisch sind nur d Gröt übrig bliba, dia da Candy denn, wias do mit am Müll üblich isch, einfach übern Zu gschmissa hot.

Bild 4: Vom viela Weallarita han i scho an köriga Kohldampf ka und han denn o am Candy gset: "I am really aguna agum!" (I han voll Hunger)

Bild 5: Am Obad erwacht dia Schtroß hinterm Strand zum Leaba und alles mögliche würt verkoft. Mir hond üs do meischt Suja und Plantaines (Große Bananasurta dia ma nur grillt eassa ku und so ziemlich guat schmeckt.) kholt.
Und so isch o da letschte Obad umme ganga. Viel Schönes, viel Neues, aber o viel unverständliches han i do widr gseaha. Insgesamt einfach widr a klasse Erfahrung, dia i fescht in Erinnerung palta wür.